《明星》

♂：早晨

♀：早晨

♂：...

《明星》

♂：早晨

♀：早晨

♂：問下行內人既你，你心目中既明星係邊個？

♀：好多喎

♂：今日我經過商場見到班追星既，我去睇熱鬧，雖然佢地好紅，但我真係講唔到太多佢地既代表作出黎，或者我老喇，心目中既明星都係班上左年紀既人

♀：係啊你老喇，就好似我老豆都仲係會聽許冠傑咁，每代人都會有佢地既明星，對你講邊個係你心目中既明星？

♂：應該係Beyond，首首歌我都識唱；又或者周星馳，套套戲我都熟

♀：會追星既都係年輕人，因為星係天上面，係一種仰望，仲讀緊書既年輕人會希望自己有日可以成為佢地

♂：但我真係唔覺佢地有乜咁值得追

♀：因為你唔再年輕，你唔需要偶像，你依家年紀都比佢地大，你會覺得，點解佢地呢個年紀可以做到咁既成就，有咁多人喜歡，但你就唔可以，為左令自己好過，你會否定佢地

♂：我無否定佢地，只係同我心目中既相差太遠

♀：你又有冇諗過，你心目中既明星花左幾多年時間先做到今時今日既成就？而依家新一代既明星，用得一兩年時間，對於一顆種子，你拎大樹去比，會唔會唔太公平？

♂：咁到佢地有成就既時候，我都會承認佢地係

♀：我最喜歡既明星係張國榮，但佢出道既時候都比人話佢係偶像派，無實力，種子係需要養份同埋灌溉先可以成長，無人支持佢地，只睇收獲，咁係雞先定蛋先既問題

♂：可能我真係老喇……不知不覺成為左老屎忽

♀：你係正常人諗法，我見太多，每一代人對於明星既要求都唔同，只睇歌手，唔同年代唱既歌，歌詞都唔同啦，唔通今日仲唱獅子山下咩

♂：其實點解你會入左呢行？我想聽真實原因，而唔係wiki到既版本

♀：因為我讀書無我家姐咁好，佢係劍橋畢業，而我讀邊間你都知啦，有人天生就係讀書既材料，我比佢花更多時間同心機都唔會有佢讀得咁好，所以我放棄左同佢係同一條賽道比

♂：你比我成熟……大家都係活係陰影之下，你選擇面對，我選擇逃避……

♀：逃避既你都有唔少我無既野，你比我去得多國家，比我見識更多，我只可以話窮得只有錢

♂：你仲有身份地位同粉絲

♀：你份人最大既缺點就係成日比較

♂：我知，我都改緊

♀：你有冇目標？

♂：當然有啊，你都知我目標係點？

♀：咁你今日點解仲未做到？

♂：唔……有好多原因喎

♀：我教你一個方法，我自己都成日會問自己，今日既自己，有乜咁好，你舉例舉十個出黎，你做今日既自己有咩好處

♂：好似無乜好處……

♀：咁你點解仲要做今日既自己？就好似你想去外國咁，應該係個邊生活好好，你唔想留係度，因為呢度有唔好既野，當你數唔出呢個地方有咩好既時候，就會自然離開

♂：我諗我明左唔少野，多謝你

♀：你又知唔知你最大既優點係咩？就係願意去聽，願意去改，我唔係因為你既缺點而喜歡你，而係你既優點啊

♂：同你講個秘密，我從來都無同人講過真正既夢想

♀：娶到我？

♂：呢樣都係，但未識你之前我既夢想係，到我死個日，會有好多好多人會為我既離去而可惜，會喊，會傷心難過，愈多人就愈好

♀：你真係一個怪人，我第一次聽到有人會希望人地唔開心，仲要愈多愈好

♂：所以我一直都唔會講出口，因為我知唔係一個好好聽既夢想

♀：至少我會為你而喊，你離成功又近一步喇

♂：你最好死先過我，我唔想你因為我而喊

♀：都算你好記性！你話過唔會再整喊我！

♂：我好記得呢個承諾！

♀：算你啦，你要加油，令更多人為你而喊！渣男！晚安

♂：講落又真係好似渣男，所以唔可以比人知，晚安，我好掛住你

#長傾不見 #蔣薇 #小說 #故事 #好久不見

未睇過既重頭睇：
https://www.patreon.com/maydreaming/posts?filters[tag]=長傾不見&sort=published_at

---